ایسلام و قادین

ایسلام و قادین

  ايسلامدا قادين قونوسو ديگر سورونلارلا ايچ-ايچه دير. بو يازيدا سياسي و ايجتيماعي آچيدان ايسلام مؤوزوعسو اله آلينميشدير.  ايسلامدا قادينلارلا ايلگيلي آيريمجيليق عومومي ايسلام آیریمجیلیق دوزه ني نين بير پارچاسيدير.     

1- ايسلامدا قادينلارلا ايلگيلي آیریمجیلیق عومومي ايسلام آیریمجیلیق دوزه ني نين بير پارچاسيدير. قاديني آشاغيلامانين اؤته سينده ايسلام آیریمجیلیق سيستئمينده بونلاري دا گؤرمک مومکوندور: موسلمان، موسلمان اولماياندان اوستوندور. محمد و اونون سويو ديگر موسلمانلاردان اوستوندور. بوتون زامانلاردا و مکانلاردا محمد سوننتي ديگر سوننتلردن اوستوندور. قورئيش قبيله سي ديگر قبيله لردن اوستوندور. عرب ديلي بوتون ديللردن اوستوندور. روايتلر عاغيلدان اوستوندور. ايداره ائدنلر، ايداره اولونانلاردان اوستوندور. آزاد آدام کؤله آدامدان اوستوندور.  

  بو آیریمجیلیق دوزه نينده قادينين آشاغيلانماسي ديگر عاميللرله ايليشکيليدير. ان اوستون مؤوقئع اؤلکه ني ايداره ائدنلره مخصوصدور. بو اورتامدا دا ان اوستون مؤوقئع شوبهه سيز کي، پئيقمبره و اونون عاييله سينه خاصدير. کيشيلرين اؤزلرين مخصوص دَيَرلري وار. قادينلارين دا دَيَري کيمين قاديني اولمالاريندان آسيلي اولموشدور. اؤزلري نين باغيمسيز دَيَري اولماميشدير. ان آشاغي يئر موسلمان اولمايان کؤله قادينلارامخصوصدور. بو کؤله قادينلارين هئچ بير حاققي يوخدور. کؤله ليگين لغوي ايله باغلي ايسلامين هئچ بير اؤنريسي يوخدور. ایسلام کؤله ليگي قبول ائتميش و داها سونرا غنيمتلر حسابينا زنگينلشن صحابيلرين سايسيز کؤله لري اولموشدور. ايسلامين تاريخي اينکيشافي سوره سينجه بونلارين اؤرنکلرينی گؤرمک چتين دئييلدير. موسلمان اولمايان بير قادينين هئچ بير حاققي يوخدور. او، ساواش غنييمتي ساييلير. ساتيشا بوراخيلا بيلر. هئچ بير اخلاق پرينسيبلرینه اويمادان اونونلا موسلمان اولان کيشي سئکس ياپا بيلر. اونو دؤيوب اؤلدورسه ده شريعت حوقوقو باخيمیندان هئچ بير سورقولانماسي اولماز. چونکو او، موسلمان اولمادیغی اوچون بیر هئچدیر.

2- ايسلامين اورتايا چيخيشيندان سونرا قادين هاقلاري قونوسوندا بؤيوک دَييشيکليکلر اولدوغونو ايديعا ائديرلر. تاريخي بلگه لره داياناراق بو ايديعالارا گووَنمک مومکون دئييلدير. ايسلام اؤنجه سي ايله ايسلام سونراسي دؤنه مي قادين مسئله سي ایله ايلگيلي موقاييسه ائدرسک، بؤيله بير سونوجا وارا بيلريک: ايسلام اؤنجه سي عرب کولتورو قادين قونوسوندا ايسلام سونراسي دؤنمدن داها ايره ليجي اولموشدور. محمدين حياتينداکي اولايلارين روايتي ده بو ايديعاني دوغرولاماقدادير. محمد دييشيک اينانجلارا مئيلله نيب و اونلاري تبليغ ائتميشدير. آنجاق محمددن سونرا باشقا اينانجلارا مئيلله ننلرين جزاسي اؤلوم اولموشدور. حتّی بير تک آدام يهودي و خريستيان بيله، ايسلامدان سونرا عرب ياريماداسيندا قالماميشدير. يا اؤلدورولموش، يا دا سورگون ائديلميشلر. گونوموزده ده مککه و مدينه يه موسلمان اولمايان اينسانلارين گيريشلري ياساقدير. تولئرانسين آزالماسي طبيعتي اعتيباري ايله قادينلارين ضررينه اولموشدور. ايسلامدان سونرا بير کيشي نين شخصييتينه باغلي اولمادان اورتايا چيخان بير تک قادينا راست گلميريک. خديجه و آييشه محمدين ايکي قاديني ايسلام اؤنجه سي باغيمسيز قادين شخصييتلري نين اؤرنکلريدير. ايکي قودرتلي قادين. ايسلام اؤنجه سي قادين هاقلاري کولتورو نه ايميشسه، بو ايکي قودرتلي قاديني يئتيشديرميشدي. خديجه، پئيقمبر اولمادان اؤنجه محمدله ائولنميشدي. تاجير بير قادين ايدي. ايقتيصادي باغيمسيزليغي وار ايدي. آنجاق ايسلام سونراسي بير تک خديجه کيمي اؤرنه يه راست گلميريک. چاغيميزدا ايسلامي تبليغ ائدنلر بونونلا اؤیوونورلر کي، ايسلام قادينلاري هوقوقسوزلوقدان چيخارميش و اؤزلليکله ميراث و نفقه قونوسوندا قادينا هاق تانيميش، قادين حاققيني ائحکاملارين ترکيب حيصه سي ائتميشدير. بو هاقدا دا ايسلاما اؤزل بير ايمتيياز تانيماق دوغرو اولماز. ايسلامين اورتايا چيخيديغي دؤنمله ايلگيلي الده اولان محدود بيلگيلر قادينلارين هئچ بير هاقلاري نين اولماديغيني سؤيله مزلر. محمدين ايلک قاديني خديجه نين حياتي بونون آچيق اؤرنگيدير. خديجه مولک صاحيبي ايدي. عرب اولمايان اؤلکهلره ايسلامين ياييلماسي قادينلارين هاقلاريني داها دا سينيرلاميشدير. گونوموزده ايسلامين قادينلارا تانيديغي حاقي ايديعا ائدن تبليغاتچيلارين عصاس اوزرينده دوردوقلاري سورون بودور کي، ايسلام قيز چوجوقلاري نين ديري-ديري باسديريلماسينی اؤنله ميشدير. بيزيم تاريخله ايلگيلي منطيقلي آراشديرماميز بو مؤوضوعنو ساوونماقدادير کي، هئچ بير توپلوم اؤز سويونو اورتادان قالديراجاق عنعنه لر اوزرينده دورماز، دورا بيلمز. بو جينايت، بلکه قيزلاري چوخ اولان بعضي اشراف عاييله لرده اولموشدور. آنجاق حياتين منطيقينه گؤره بو، بوتون عربلرده يايقين اولان بير کولتور اولا بيلمزدي. او زامان بو سورو اورتايا چيخار: اگر بئله قیزلاری باسدیرما کیمی کؤکلو بیر عنعنه وارمیشسا، ندن او زامانا قدر عربلرين سويو توکنمه ميشدير؟ ايسلامين اورتايا چيخديغي زامان بو پروبلئمين اولدوغو اوزرينده ايصرارلا دورماقداديرلار. بو دا اونو گؤسترير کي، او دؤنمين چوخ قادينلي زنگينلريني بؤيله بير کومپلئکس داشيميشلار. چوخ قادينلي و چوخ اوشاقلاري اولان عرب زنگينلري. قيز چوجوغونو ديري-ديري باسديرماق خالقين ايچينده يايقين اولان بير پروبلئم اولماميشتير. عرب زنگينلرينده بؤيله بير کومپلئکس اولموشدور: قيز آلماق، آنجاق قيز وئرمک ايستميرديلر. او زامانکي بارماق سايي عرب زنگينلري نين شهوتلريني و ناموس آنلاييشيني گؤسترن بو کومپلئکس بوتون عرب ميلتي نين گلنگي کيمي گونوموزده سونولماقدادير. بو دؤنمده جينسي شهوت سورونونون بير طرفينده کيشيلرين اوستونلوگو و ديگر طرفينده قادينلارين آشاغيليغي گؤرونمکده دير. بو توپلومدا کيشي اوستوندور قادين آشاغيليق ياراديليش. ايسلام اولاراق آدلانان کولتور، محمد اونون گتيريجيسي اولدوغوندان دولايي هله ده بو کومپلئکسي اؤز ايچينده داشيماقدادير. ايسلام بو پروبلئمي چؤزمه مکله قالماميش، اونو کونسئروه ائده رک گونوموزه قدر گتيرميشدير.  

  3.     ايسلامين ديگر آيريمجيليقلارلا ايليشکيلي اولدوغونو سؤيله ديک. ايسلام اؤلکه لري اؤز يايقين سوننتلري ايله ياشاديقجا، بو، بير پروبلئم کيمي گؤرونموردو. ايسلامين سياسي و ايقتيصادي ستروکتورو چؤکوب و چاغداش دَيَرلرين اورتايا چيخماسي ايله ايسلامداکي آيريمجيليق سيستئمي ده ايفشا اولماغا باشلادي. ايسلام اؤلکه لرينده کولتور شوکو ياشانماغا باشلاندي. ايسلام بيليمجيلري بو بؤهرانين اورتايا چيخماسي ايله ايلگيلي اولاراق بير سورو تئوريلر گليشديرمه يه چاليشديلار. ايسلامدا اولان بعضي آيريمجيليقلاري چاغداش دونيا مغلوب ائتدي. اينسان هاقلاري آنلاييشي اونلاري اونوتدورماغا چاليشدي. اؤرنگين موسلمان اولمايانلارين نجيس اولماسي، موسلمان اولمايانلارلا دوست اولماماق کيمي ايسلام حؤکملری، اينسان هاقلاري باسقيسي اوزوندن اورتادان چيخماغا محکوم ائديلدي. ايسلامين موسلمان اولمايانلارلا ايرتيباط قورماماق، يا دا احتياطلي اولماقلا ايلگيلي حؤکملري عملده اؤز کئچرليليگيني ايتيرميشدير. دوقماتيک ايسلامدا دييشمه ين اساسن قادين هاقلاري ايله ايلگيلي آيريمجي باخيش اولموشدور. نه قدر ايره ليله ميشسه، ايسلام کومپلئکسينده قادي نين مرکزي اؤنه مي اولدوغونو گؤرموشوک.  

  4.     تمل متنلرده ايسلامي سؤيله مي اولوشدوران قبيله ياپيسي اواموشدور. اسلام توپلومو تاجيرلري و ساواشچيلاري قیمتلندیرمیشدیر. تاريم ايقتيصادي دوزنيندن، يا دا شهر حياتيندان يوغرولموش اولان دينلر قادين مسئله سينده داها يومشاق توتوم سرگيله ميشلر. ايسلامي فيقهين   اؤزو شهر حیاتيندا فورمالاشميشدير. فيقهده قادينلا ايلگيلي اولان حؤکملرين بير بؤلومو ساواش پریينسيبلرينه گؤره دير. قادين ساواش غنيمتي و ساتیش اشياسي کيمي دَيَرلنديريلير. قادين مسئله سي ايله ايلگيلي سورونلار گئنلده قبيله اؤنيارقيلاري ايله قارشيلاشار. قبيله نين اخلاق آنلاييشي ناموس اؤلچوسو اولاراق گؤرولموشدور. قبيله نين دوشمنلرينه آشيري نيفرت و قبيله نين عوضولرينه آشيري سئوگي بو اؤنيارقي نين اؤزلليگي اولموشدور. بو باغلامدا قادين ناموس آنلاييشي نین اؤنملي قونوسو کيمي گؤرولموشدور. قادين، قبيله يه منسوب اولمايان يابانجي ايله ايرتيباطدا اولماماليدير. بورادا يابانجي آنلاييشي قادينا و کيشييه گؤره دَييشير. قادين مسئله سينده يابانجيلارين سايي داها دا آرتيم گؤسترير. اؤز قادينيني، باجيسيني و آناسيني دار و قاپالي موحيطده ساخلايا بيلمه ين کيشي ناموسسوزدور. ناموسون گؤرونتولريندن بيري حيجابدير. هيجاب، قاديني قورويان داخيلي بير ديواردير. قادين ائودن ديشاري چيخديغيندا بو ديواري اؤزو ايله داشيماق زوروندادير. دينه گؤره قادين سورکلي ائوده اوتورسا، داها ياخشي اولار. دينين بؤيله ايستگي تاريم کولتور اورتاميندا کئچرلي اولا بيلمز. چونکو تاريم حياتيندا قادين و کيشي بير يئرده تارلالاردا چاليشماق زورونداديرلار. او زامان بؤيله بير سورو اورتايا چيخير: فيقه هانسي سوسيال مودئلي اؤز حؤکملري نين شکيللنمه سي اوچون اساس آلميشدير. فيقهين نظرده توتدوغو توپلوم سورکلي ساواش و جيهاد دوروموندا اولان توپلومدور. بو توپلوم ساواش اورتاميندان باريشا کئچديگي زامان تام بير اورتا چاغ مودئلي اورتايا قويموشدور و هله ده بو شکيلده داوام ائتمکده دير. فيقه شهر حياتيندا تاجيرلر صينيفي نين احتيياجلارينا ديقت ائدر. تاجيرين پوزيسيونو ايدئال بير موسلمان پوزيسيونودور. گليري وار، خومس و ذکات وئره بيلير. بو باخيمدان دين عاليملري نين، يعني فقيهلرين ماددي احتيياجلاريني تاجيرلر تامين ائدير. تاجيرلر دين عاليملري نين ايقتيصادي آللاهلاريدير. تاجيرلر بير سورو قادين آليب اؤزلرينه و دين عاليملرينه حرمسرا دوزلده بيليرلر. بو باخيمدان ايسلام تاريخينده تيجارت جينسي سئکسوال فانتازييالاري اؤز اخلاق آنلاييشيندا داشيميشدير. تاجير قاديني و يا قادينلاري نین چاليشماغا احتيياجلاري يوخدور. تاجير قاديني نين و يا قادينلاري نين ايکي اؤنملي وظيفه سي وار: 1. تاجيرين سئکسوال فانتازييالاري نين گئرچکلشمه سيني ساغلاماليدير. 2. تاجير اوچون ائولاد دوغروماليدير. بو ياشام اورتاميندا بو قادينلار اوچون قارينلاريني دولدوراجاق سينيرلي هاقلار تانينميشدير. بو سينيرلي حاقي گؤز اؤنونده بولوندوراراق ايسلام عدالتيندن يانا ايديعالاردا بولونولماقدادير. تاجير آدام شريعت چرچيوه سينده سونسوز سئکسوال فانتازييالار قورما و ياشاما حاقينا صاحيبدير. ايسلام سئکس فانتاستيکاسي گئنلده موسلمان تاجيرين سئکسوال فانتازيياسيدير. او، ياخشي پارا قازانير و چوخلو قادينلارلا سئکس ياشاما حاقينا صاحيبدير. اونون سئکسوال فانتازييالارلا ياشاماسي اوچون فيقه علمي شرعي تفسيرلر، آچيقلامالار قلمه آلميشدير. موسلمان بير تاجير، يالنيز بو دونيادا سئکسوال فانتازييالارلا ياشاماز. خومسونو و ذکاتينا وئريب دين عاليملريني بسله ين تاجيرلر اوچون او دونيادا دا هوريلر سئکسوال فانتازييالار اوچون بکله مکده ديرلر. دين عاليملري تاجيرلرين، يالنيز بو دونيادا سئکسوال آزادليغينا شرعي زمين ساغلامازلار. او دونياداکي گؤزللر ده تاجيرلرين سئکس حياتي اوچون ياراديلميشدير. موسلمان بير کيشي نين اخلاق آنلاييشي ايسته ديگي قاديني اؤز حرمسراسينا داخيل ائتمه يه ايذن وئرمکده دير. يئتر کي، بونون اوچون ايقتيصادي اولاناقلاري اولسون و قاديني بير اشيا کيمي آليب حرمسراسي نين زينتلي اشياسي کيمي قوللانسين. حرمسرادا هر شئي حالالدير و مکروح ايش ياپيليرسا، اونو دا کوففاره اؤديه رک گوناهلاريندان آرينماق اولار. حرمسرا حالال و هارامين سينيرينی بللي ائدر. حرمسرانين ايچينده اولانلار حالالدير، نئجه ايسته ييرسه داورانا بيلر، اوراداکي قادينلارين فيکريني سورماغا دا گرک يوخ.  

   مودئرن چاغدا حرمسراليق چتينليکلرله قارشيلاشميشدير. بعض تاجير موسلمانلار حرمسراسینا بير اشيا کيمي آرتيرا بيلميه جک قادينلارا مئيلله نيرلر. چونکو مودئرن چاغ قاديني دَييشديرميش، قادينا ايقتيصادي هاقلار تانيميش و جسارت وئرميشدير. بو اوزدن ده مودئرن چاغ موسلمانلارين سئکسوال فانتاستيکالاريني بؤهرانه سوخموشدور. تاجير موسلمانين فيلملرده گؤردويو قادينلار اونا تسليم اولمور. موسلمان بير کيشي مودئرن قادي نين عؤهده سيندن گله بيلمير و بير موسلمان اوچون بوندان آشاغيلاييجي بير شئي يوخدور. موسلمانين چاغداشليغا و مودئرنیته يه نيفرتي ده بوردان قايناقلانير. موسلمانين ايديعا ائتديگي «ديني دَيَرلريميزي باتي اورتادان قالديرير»سورون دا بودور. چونکو اورتادان قالديريلان اونلارين سئکسوال فانتازييالاريدير. ايديال موسلمان کيشي تيپي ساديسم خسته ليگينه موبتلادير. اونون مودئرنيزم دوشمني اولماسي ساديسم خسته ليگيندن قايناقلانير. ايسلام شهرلري قادينلار اوچون گوونسيز شهرلردير. دونيانين هئچ بير يئرينده تئهراندا و قاهيرده اولدوغو قدر قادينلارا بارماق ائديلمير، آشاغيلاييجي آتماجا سؤزلر دئييلمير. قادين سورکلي ساوونما دوروموندا اولماليدير. هيجاب و ساديسم فئنومنلريني بير-بيرلريني ياشادان خسته ليک کيمي گؤرمک گره کير. هيجاب مسئله سي نين کؤکلو چؤزومو موسلمان کيشيسي نين تاريخي بيلينجالتيندان ساديسم خسته ليگيني چيخارماق و موعاليجه ائتمکله مومکون اولار.  

6- يئني چاغ اينسانلارين سئکسوال فانتازييالاريندا دا اينقيلاب ائتميشدير. اؤزلليکله ايسلام توپلوملاريندا بو ساهه ده کي دَييشيملر پريشانليقلارلا ايچ-ايچه دير. ايسلام اخلاقي اوزرينه يازيلميش مجليسي نين «حيليت المتتقين» کيمي فيقه کيتابلاري گئرچک بير موسلمانين سئکسوال فانتازيياسي نين گوزگوسودور. يئني چاغ ايسلام عاليملري نين تصوير ائتديگي سئکسوال فانتازييالاري بؤهرانا سوخموشدور. ايراندا ایسلام اينقيلابي ايسلام سوننتينده يايقين اولان سئکسوال فانتازييالاري ديريلتمک ايسته ميشدي. آنجاق مودئرن چاغ موسلمانين سئکسوال فانتازيياسيني پوزدوغوندان دولايي موسلمان اينسان تيپي پريشاندير. موسلمان اينسان ضعيفليک هيسس ائدير. تاريخينده و شعورالتيندا داشيديغي ساديسم سياسي داورانيشينا يانسييير و اوندان بير فاشيست اينسان اولوشدورور. ايران اهاليسي نين بؤيوک بير قيسمي ايسلام اينقيلابيندا اؤز سئکسوال فانتازييالاريني گئرچکلشه جگيني گؤروردولر. اونلار بو رئژيمين بير چوخ سياسي داورانيشلاري ايله راضي اولماسالار دا، رئژيمين سئکسوال پوليتيکاسيني دستکله ييرديلر. اهالي نين چوخو رئژيمله بو قونودا امکداشليق ائتمه سه ايدي، رئژيم مووففق اولا بيلمزدي.   

  ايران کيشيسي نين پروبلئمي اسکي ديني سئکسوال فانتازييالاري برپا ائتمکله چؤزولمه دي. شهوت توپولوگيياسي (شهوت مکاني) اسکي سوننتله برپا ائديلمه دي و قادينلار تسليم اولماديلار. ايسلام اينقيلابي بو باخيمدان مغلوب اولدو. ايسلامي سئکس مودئرن ائروتيزمين يئرينه کئچه بيلمه دي. بو اوزدن ده ايسلام توپلوملاريندا بؤيوک سوسيال پسيخولوژي پروبلئملر اورتايا چيخدي. بو پروبلئملر موسلمانلارين آقرئسسيو و اؤلدوروجو داورانيشلارينین قايناغينا دؤنوشدو.  

7- کيشي مرکزلي ساديسم ايسلام اؤلکه لرينده يئني بير خسته ليک دئييلدير. بونون ايفشا ائديلمه سيني ساغلايان مودئرن چاغين گليشمه لريدير. ايسلام اخلاق دوزه ني نين بؤهرانا گيرمه سي ايله بير يئرده مودئرن چاغين اينسان هاقلاري آنلاييشي ايسلام اؤلکه لرينده کي بو سوسيال خسته ليگي ايفشا ائتميشدير. ايسلام تاريخينده کي کومپلئکسلر گؤزلر اؤنونه سريلميشدير. قادين مؤوضوعسو اؤنملي بير سورون اولاراق ايسلام اؤلکه لرينده داوام ائتمکله ياناشي، هم ده سياسي بير سورون حالينا گلميشدير و قادينلار دينچي ايقتيدارلارلا حسابلاشماق ايسته ییرلر. دونيادا ايسلام اخلاقي نين آشاغيلاييجي باسقيلارينا گؤره دئييل، سربستجه اؤز ويجدانلارينا صاحيب اولاراق ياشاماق ايستمکده ديرلر. ايراندا ايقتيدارين ستروکتورو آیریمجیلیق اساسيندادير. بو آیریمجیلیق فقيهلري داها اوستون گؤرمکده. موسلمان اولمايانين حاقي يوخدور. شيعه سوننيدن اوستوندور. موسلمان آتئيستدن اوستوندور. کيشي قاديندان اوستوندور. بو آیریمجیلیق داها اؤنجه دن مؤوجود اولان ديگر ايسلامي آیریمجیلیقلارلا بيرلشيب بير اورقانيزاسيون اولوشدورموشلار. بو آيريمجيليغي اورتادان قالديرمانين يولو سئکولاريزاسيون و دينين سيياستدن آيريلماسيدير. بلکه سياسي بير دَييشيم سونوجوندا ايقتيدار فقيهلردن (موللالاردان) باشقالارينا دئور ائده بيلر، آنجاق بو، دينين دؤولت ايشلريندن اوزاقلاشماسي آنلامينا گلمز. نئجه کي، بير چوخ ايسلام اؤلکه لرينده ايقتيدار اولانلار فقيهلر دئييللر، آنجاق ديني ايقتيدار حاکيمدير. ايسلامي آيريمجيليقلارين اورتادان قالديريلماسي نين تک يولو ايسلامين سيياستين ديشيندا قالماسي ايله مومکون اولا بيلر. یآلنيز سئکولار بير دوزنده قادينلارلا ايلگيلي بوتون ايسلامي ياسالار لغو ائديلر بيلر. يالنيز ايسلامي ياسالارين اورتادان قالديرلماسي ايله ائشيتليکدن و اينسان هاقلاريندان دانيشماق مومکون اولا بيلر. قادين-کيشي برابرليگي، آنجاق سئکولار بير سيستئمده مومکون اولا بيلر. ايسلام تاريخي ان پارلاق دؤنملرينده بيله، قاديني اشيا و مولک کيمي گؤرموشدور.  

8- ايسلام اوزرينه يئني آچيقلامالارلا ايسلامداکي آيريمجيليغي اورتادان قالديرماق ايسته ين يئني دوشونورلر ده واردير. بونلارين بو باسقيجي تاريخ قارشيسيندا مووففق اولاجاقلاري کسين دئييلدير. ايسلامدا رئفورمدان يانا اولاراق بو سورونو چؤزمک ايسته ين آيدينلار دا گونوموزده بير شئيلر يازماقداديرلار. اونلارين ديني متنلري آزادجا تفسير ائديب آچيقلامالاري اوچون ايسلام اؤلکه لرينده کي قورخونج سانسور اورتادان قالديريلماليدير. بو دا دينين دؤولت ايشلريندن تام اولاراق اوزاقلاشماسيني ايجاب ائدر. دينين سيياستين ديشيندا قالماسي ايله بو سانسور اورتادان قالديريلا بيلر. بو اوزدن ده دينين راسيونال آنلاشيلماسي اوچون ده سئکولاريزاسيونا احتيياج وار. بير اينسان هم مؤمين، هم ده اؤزگورلوکچو اولا بيلر. اونون دونياني نئجه آنلاييب آچيقلاماسي اؤزونو ايلگيلنديرن بير قونودور. حقيقت باشقا مؤوضوع و بير يئرده باريشچيل ياشايا بيلمک ايسه، تامام باشقا مؤوضوعدور. سون 30 ايلده ايران توپلومو دريندن دَييشميشدير. ديندار کسيمين ايچيندن ده دينه قارشي عوصيان سسلري يوکسلمکده دير. اونلار بيله، قادينا برابر هاق تانينماسيندان ياناديرلار. هم قادينلار، هم ده کيشيلر دَييشميشلر. اينسان هاقلاريني بو شريعت تاريخينه قارشي ساوونماق اوچون اويغون توپلومسال زمين اولوشموشدور.  

9- سيياسي سئکولاريزاسيون قادين سورونلاريني چؤزمک اوچون دؤنوم نؤقطه سيدير. يئني سئکولار دوزنده آتانين، ارين و اوغلانين عاييله نين مرکزينده دورماسي اؤنلنمه ليدير. بو اوزدن قادين مسئله سي نين چؤزومو سوسيال تاميناتين برقرار اولماسي ايله مومکوندور. يعني چؤرک، ايش و ائو سورونلاري کيمي. بو سورونلارين چؤزومونده قادينا باغيمسيز اينسان کيمي باخماق گره کير. بو باغيمسيز باخيشي دا سياسي و حوقوقي سئکولاريزاسيون ساغلايا بيلر. اينکيشاف و عدالت، جينسي آيريمجيليغي اورتادان قالديرمانين تمل مسئله سيدير.